الجمعة، 2 سبتمبر 2011

مثل السيدة العجوز !

صباحـكمــ / مسـاكمــ خير

شخباركم ؟!

اليوم راح أتكلم عن اضرار السمنة مو بالتفصيل الممل بشكل مجزء وبسيط ، لأنه لله الحمد إحنا مجتمع مثقف وواعي - وأي أحد تسأله عن أضرار السمنة اكيد راح يتكلم ويجاوب -

طبعا من أضرارها :

آلام العظام خاصة في منطقة الظهر والركبتين والأقدام

وهذا نتيجة لثقل الوزن اللي تحمله العظام





أنا اعاني من هالشي

مثلا/

 لو تمشيت بالسوق

ما أتحمل امشي لمدة طويلة !

على عكس البنات اللي بعمري

أحس بعوار مو طبيعي من راسي لرجولي

على طول أحوس وأدور على كرسي بالمحل أو كافيه علشان ارتاح فيه

مثل العيوز !!


طبعا ماكو غير حـل واحد هو :

إنقاص الوزن



حاولت أدور عن حلول مؤقتة
علشان اقدر أمارس حياتي بشكل طبيعي

هاذي مو حالة !!!

كل ما أمشي خطوتين أحس بعوار يذبح

*******

فكرت ألبس ( جواتي طبية)


الجواتي الطبية أحسن بوايد من الجواتي العادية

 فيها تقنية تريح وتخفف الالام الناتجة من الظهر والركب والأقدام



جربت أكثر من محل بالكويت
وطبعا الأسعار تترواح مابين ( 40 الى 60 دينار)
نصيحة اذا بغيتوا جوتي طبي ، اشتروا بموسم التنزيلات بسرعة
لانه المقاسات السنعة تخلص



من خلال تجربتي :


إيكو : محل دنماركي
معروف عند الرياييل حيل

بس ، اذا رحت ادور على جوتي حقي دايمن أتوهق
لانه المجموعة النسائية شوية

شريت  كعب شكله ولونه حلو وايد
لكن مع الوقت ، قصته ما ناسبت ريولي
وقامت تعورني حيل وأصابعي تورم
صرت ما ألبس هالكعب الا في المناسبات والزوارات
بس اطلع فيه السوق
no way

أروح المحل من فترة الى فترة واتطمش
وقايست أكثر من جوتي
لكن مع الأسف
ما احس براحة نهائيا ..!!




كلاركس : محل بريطاني

الاحذية النسائية أكثر تنوع وعدد من ايكو
حتى الألوان تشوق

أذكر شريت منهم جوتي ( فلات)
روعة وحلو
لكن بعد جم مرة من الاستخدام
حسيت بعوار
يمكن الفلات ما ينفع معاي@_@







جيوكس : محل إيطالي

ألوان الجواتي عجيبة عجيبة


أذكر قست عندهم جوتي ،حسيت براااااااحة على الآخر
لكن ، على اخر لحظة ترددت وماشريته
شكل الجوتي ماعجبني ، صاير جنه رجالي
حسافة كان لونه روعة

يتروالي هالمحل تشترون منه للسفر لانه مريح حــيل :)

اذا شريت منه جوتي وجربته راح ابلغكم عنه





المحل اللي عجبني حيل ومرتاحة معاه


مفيستو: محل فرنسي 

الألوان والقصات وشكل الجواتي النسائية واااااااو
 الجوتي بمجرد ماتقيسونه  تحسون براحة موطبيعية

شريت من عندهم وجربت أكثر من جوتي
ومع فترة من الاستخدام ارتحت معاهم
هالمحل الوحيد اللي اذا دخلته ادري راح اشتري جوتي سنع من غير تردد وحسافة


نزلوا خط جديد من الأحذية تعتمد على تقنية هوائية جديدة

هذا هو الرابط علشان تعرفون عن التقنية أكثر :



وهذا فيديو توضيحي :






بالاخير : الجواتي الطبية مو حل نهائي لآلام العظام لكنها أفضل بكثير من الجواتي العادية من حيث الجودة والصناعة وتساعد على المشي الصحيح والتخفيف من الآلام في حالة وجودها





حبيت أشارككم بتجربتي مع الجواتي الطبية

اذا تعرفون محل للجواتي الطبية شاركونا بتجربتكم



:)

هناك 10 تعليقات:

رورو الشخبوطه يقول...

احب بوستتج لانه اغلبه تجارب شخصيه..

ماعمري جربت جواتي وانتي بكرامة طبيه بس اختي تاخذ من برنس جنه ..

ومشكوره ع المعلومات..

Now or Never يقول...

رورو : يا هلا فيج يا قلبي :)

أنا ودي انقل كل تجربتي .. علشان على قد ما اقدر افيد الكل


نصيحة جربي الجواتي الطبية سواء اكنتي متينة أو ضعيفة ..

الجوتي طبي يريح الظهر حتى المشية تكون مختلفة على الاقل احتفظي بواحد للمشاوير او السوق


عاد ودي اجرب هم من محل برنس ؟
واااااايد اشوفه ولا ادخله

العفو وحياج ربي

AM.SA.CHANNEL يقول...

مب حل ترى الجوتي الطبي، و إذا فكرتي فيها لين متى بتمين على جواتي طبيه، صح الجواتي أو النعول الطبيه واايد أحسن من العاديات و تخفف الآلام لكن لو سألتي نفسج لين متى بتتحملين تلبسين جواتي طبيه عشان كيلوات زايده في جسمي .. كلنا مرينا بهالمرحلة و كلنا مرينا بأنه النعول العادية ما تنخش بريوولنا لكن من الطيح الكيلوات بتحسين بالفرق ..

واااايد إستانست أنا بعد يوم لقيت مدونة تهتم بهالسوالف نادر ما ألقى

Now or Never يقول...

شانيل : أنا مع رايج تماما

وذكرت في البوست السابق (مثل السيدة العجوز) انه الحل الوحيد لالام العظم هو انقاص الوزن وانه لبست الجواتي الطبية مجرد حل مؤقت :)

والله انا اللي استانست حيل بوجودج

مشكلة السمنة المفرطة منتشرة بين النساء والاطفال اكثر

علشان جذي حبيت اتشجع واسوي مدونة عن رحلتي للرشاقة لانه خلاص اتخذت هالقرار :)

ساره النومس يقول...

عاد تصدقين انا ماتعب من المشي ولا الركض ولا الحركة بس ماضعف :( حتى لو سكرت حلجي :(

Now or Never يقول...

طموحة مملوحة : يا هلا وغلا فيج :)

حاولي تراجعين عيادة او مستشفى علشان تعرفين سبب السمنة ..

من خلال الفحوصات يمكن اتعرفين اسباب الشهية وشنو النظام الغذائي اللي يناسبج

Romia Fahed يقول...

وايد مشكورة على البوست فعلًا كنتْ
أبي أشتري جوتي طبّي لأمّي ولا عرفت من أي محل ، عجبني mephisto .

متابعة لمدونتج .. ورحلة للرشاقة
عسانا نشوفج بصحة وسعادة دوم.
أهم شي لا توقفين البوستز :) .

دمتِ لمن تحبي

Now or Never يقول...

رومايا : والله انا اشكر تواجدج الحلو في مدونتي - ربي يحفظ الوالدة ويعينها

وشكرا جزيلا لدعائج ( آآآآآمين)

manal يقول...

عجبني موضوعج بس ماقلتي المحل الاخير وين مكانه ااعتقد الطبي ينفع للسفر والله يوفقج حبيبتي

Now or Never يقول...

منال : يا هلا والله فيج

بالنسبة لمحل مفيستو موجود في محل ايكو (فرع صغير) بالمارينا

الفرع الكبير موجود في الأفنيوز المرحلة الثانية صوب صالون ارنوبة ودبدوب وكافيه كوستا