السبت، 17 سبتمبر، 2011

I used to be fat ^_^





السلامـ عليكمـ

في  قناة إسمها : Mtv arabia




فكرة عن القناة :

اهي عبارة عن  نسخة عربية عن قناة mtv الأمريكية

وهي قناة موسيقية تعرض الاغاني الانجليزية و العربية

بالاضافة الى برامج أمريكية مترجمة 

وايد برامج أحبها على هالقناة مثل :

made

punkd

cribs

true life

 I used to be fat

هالبرنامج يتكلم عن اشخاص يعانون من السمنة المفرطة والبرنامج يوفر لهم مدرب رياضي + برنامج غذائي صحي
لمدة عطلة الصيف حتى يتم التوصل الى الوزن المثالي




الصراحة هالبرنامج روعة وموطبيعي



اللي سمعوا عن هالقناة او من المتابعين

حياهـم الله

:)


Healthy..starbucks 2




صباحكم / مساكم خير :)

أكمل معاكم سلسلة الخيارات الصحية
من كافيه ستار بكس
starbucks


اللي ودهـم يقرون من البداية تفضلوا رابط البوست السابق :




بغيت اروح الجمعية ضروري !!

وبطريجي أقرب جمعية كانت جمعية العديلية

بعد ماحست فيها وتشريت الأشياء  الضرورية

شفت بالطابق العلوي عندهم .. مكتبة !!

الصراحة ...

أنصح الكــل ...

يروح ويتشرى من  مكتبة جمعية العديلية 
 أسعارها رمزية وعروضات حلوة

المهم بعد ماخلصت من الجمعية والمكتبة:

رحت ستار بكس starbucks - فرع العديلية

طلبت ساندويش اسمه : صب أسمر مع الخضار المشوية




رايي :

الخبز يهبل ولذيذ

الصمونة متروسة  فيها فلفل وطماطم وخياروباذنجان وجرجير وشوية جبن 

هذا اللي خرب عليها لومكثرين الجبن يتروالي الطعم كان مختلف
@_@

تحسس بالشبع لدرجة ماقدرت أكمل الجزء الثاني من الصمونة

بس ماحبيت الطعم :/

،
،
،

 مع تمنياتي لكم بحياة أكثر صحة وجمالا
:)

تنويه : رابط المدونة !!

السلامـ عليكم

قراء والمتابعون الأعزاء


تم تغيير رابط المدونة الى :

q8now-or-never.blogspot.com

وشكرا

:)

الجمعة، 16 سبتمبر، 2011

استراحة محارب :)

قـــوة

مساحة ..لفرفشة ..للوناسة

بعيدة عن الريجيم والتعب والشغل اليومي والضغوطات النفسية

تابعوا جديد هالمساحة :)


راح أكتب فيها اليوم عن تجربتي في :

كافيه كوستا (فرع الأفنيوز)

طلبت ساندويش حلوم بخبز الصويا



رايي:

الخبز وايد حلو

بس الحلوم ماااااالح بزيادة

ماعجبتني :/


**************************


طلبت بيتيفور مشكل
من هالمحل petit pie dessert
رقمهم :60667111






رايي :

يا جماعة لايطوفكم

على ضمانتي

الكيس كشخة 

العلبة كشخة

الطعم لذيذ لذيذ وألوان البيتيفور تشوق تشوق

 راهي

 السعر معقول (8دنانير)






اللي وده يشارك بتجاربه عن المحلات السابقة

حياه الرحمن


:)

الاثنين، 12 سبتمبر، 2011

مسابقة يدا بيد نصنع المستحيل :)






((منتدى كويتيات النسائية المميز))




مافي كويتية ماتعرف منتدى كويتيات 
وشهرته وصلت الخليج العربي !!



المنتدى يحتوي على اقسام متعددة ونشطة

من بينها قسم السمنة والنحافة

ودائما وأبدا يعودنا هالقسم بأنشطة..
وفعاليات مو طبيعية طول السنة ^_^


هالقسم بالذات فيه مواضيع متنوعة تتكلم عن:

 انظمة تغذية ومقالات صحية
ومواضيع نقاشية وتجارب شخصية...الخ



حاليا المشرفات عن القسم
اطرحوا مسابقة بعنوان : (يدا بيد نصنع المستحيل )

المسئولة عن المسابقة : احلى عيون - يعطيها مليون عافية






سبب اشتراكي بالمسابقة :

* أحفز واشجع نفسي

* علشان اضبط نفسي وما اخربط  
لإنه في مواعيد محددة للميزان في المسابقة

* استفيد من تجارب زميلاتي المشاركات


إدعولي انه الله يوفقني

محتاجة للدعاء في زمن أصبحت النفس هي المسيطرة

ربي عيني على نفسي


************************************




إشرايكم بخطوة اشتراكي بالمسابقة ؟

ايجابية ولا ؟


سكر stevia .. البديل السحري





صباحكم /مساكم خير :

اشلونكم ؟

كان ودي أغير السكر اللي استخدمه لانه يعتبر من المحليات الصناعية الضارة للصحة

وطرحت هالرغبة في البوست السابق .. تذكرون ؟!



بديت أدور وأبحث وأتابع ..

ولقيت الجواب في برنامج DR.OZ
واللي مايعرفونه تفضلوا رابط بوستي السابق :




نصح الدكتور أوز بسكر
هو يعتبر البديل السحري للسكريات او المحليات الصناعية



إحم إحم


هذا اهو لقيته وطحت عليه :











سكر ستيفيا STEVIA


شريته من جمعية الخالدية - السكر يعتبر مستخلص طبيعي وقليل السعرات أفضل بكثير من السكر العادي واهم شي احسن من المحليات الصناعية اللي أثبتت ضررها على مدى البعيد


معلومات أكثر عن سكر ستيفيا من موقع ويكيبيديا
تفضلوا الرابط التالي :



تجربتي :

السكر طعمه يختلف تماما عن طعم السكر الابيض
او المحلى الصناعي

ماتقبلته أول مرا .. بعدين تعودت :)

اللي يحب الدح مايقول أح !!

جربته مع قهوتي وحطيت كيس واحد ماتقبلت الطعم جان احط كيسين قدرت اتقبل الطعم اشوي

والحين قاعدة اخفف واحط كيس واحد -مشى الحال


عندكم معلومات عن هالسكر او اي معلومة ثانية

حياكم الله






السبت، 10 سبتمبر، 2011

ماجلة الدايت :)





السلامـ عليكمـ

شخباركم ؟!

مثل ماذكرت في البوستات السابقة إنه الدايت
يحتاج الى ماجلة خاصة





هذا البوست بسوي عليه up date  باذن الله تعالى




مشترياتي (ماجلتي ) من جمعية الخالدية :


العصير الطبيعي من فلوريدا ناتشورال


بعد مادخت وحست على العصاير فترة طويلة
 وجربت أكثر من شركة
طحت على هالنوع
أنصحكم فيه هالعصير طعمه لذيذ وطبيعي 100%

جربت:

 البرتقال مع اللب

 البرتقال مع الأناناس

ممتازين








سندويشات أمريكانا


متوفرة تقريبا في كل جمعيات - ثلاجة صغيرونة مخصصة لمنتجات امريكانا

متوفر فيها السلطات + السندويشات للخبر الأبيض والأسمر

إذا تبون ريوق أو عشا خفيف وعالسريع

راح تكون اختيار ممتاز


من تجربتي :

حبيت السندويشات ذات الخبز الأسمر التالية:

دجاج مع المايونيز

تونا مع المايونيز

الصدر الرومي


ماحبيت السندويشات ذات الخبز الأسمر التالية:

الفيتا
جبن مع البصل







لبنة قليلة الدسم بينار


لبنة بينار مو طبيعية الصراحة

أحس قاعدة آآآكل لبنة لبنة لبنة

آآآه مع الزعتر والزيت

واللي مايسوون دايت جربوا بينار كاملة الدسم (الخضرا)

وااااااااااااااااو


7
7
7
7
7


وعليكم بألف عافية

اذا جربتوا منتجات ثانية

لاتحرمونا من تجربتكم ومشاركاتكم

حياكم الله

:)




Healthy .. starbucks



صباحكم / مساكم خير

:)

شخباركم ؟


هالبوست  عن :

الكافيه اللي أحبه وااايد وما أستغنى عنه هو starbucks


 طبعا راح يكون أكثر من update للبوست هذا

علشان أنقل لكم تجاربي عن هالكافيه أول بأول

 إحم إحم طبعا راح تكون خيارتي كلها healthy



كنت أبددددع في هالكافية وأطلب  بدووون وعي !!

حلويات وسندويشات وكريمه وكراميل وبودرة كاكاو....الخ

هذا كله (( انتهى ))




إلحين.. قمت أفضل إختيارات في مضمونها :

صحة أكثر ، وعي أكبر ، سعرات أقل





من تجربتي :


(1)

caffe Mocha

أنا  أحب الهوت موكا حيل
بس كنت دايمن أطلبه كبير مع كريمة وكراميل

غيرت الطلب وصار :

صغير الحجم
الحليب خالي الدهون
بدون كريمة
بدون كراميل

SMALL hot mocha
 non fat milk
no whip cream
 no caramel  







(2)

سندويش صب أسمر بالديك الرومي مع الأجبان السويسرية



الحين أغلب الكافيهات  ينزلون سندويشات صحية
وجربت هالسندويشة
خبزها مو طبيعي ولذيذ والجبن يمي يمي
الصراحة كبيرة خليت اختي تعاوني فيها


*
*
*


الصور تم التقاطها في ستار بكس الجابرية

في مجمع صغير وجديد مقابل نادي جامبينز النسائي (القديم)

المجمع فيه بينك بيري وبيتزا إكسبريس بعد


هالصورة وايد إعجبتني في الكافيه :







** بالأخير : تقدرون اتروحون للمطاعم والكافيهات اللي تحبونها وانتوا ماشيين على الدايت
بس حاولوا إختياراتكم تكون:

1- صحية
2- قليلة السعرات
3-صغيرة في الحجم والكمية




يمكن تسألون هالسؤال
إشلون نعرف مقدار السعرات الحرارية
في المطاعم والكافيهات المفضلة؟!


الصراحة أنا ساعدني حييييل
هالبرنامج  موجود في  iphone


اسمه Fast Food

فيه لستة طويلة لأكثر المطاعم والكافيهات شيوعا وأفضلية
من بينهم ستار بكس


هذه أيقونة البرنامج :









حملوا البرنامج على تلفوناتكم وعرفوا كم تبلغ السعرات الحرارية في الوجبات أو المشروبات أو الحلويات اللي تحبون تاكلونها في المطاعم والكافيهات والمفضلة


ويعطيكم العافية

(*_^)





الخميس، 8 سبتمبر، 2011

ضاقت علي الوسيعة!

إِذَآ أَرَدْت أَن تَعَيَّش سَعْيَدْا ..
 فَلَآ تُدَقِّق فِي كُل شَيْء ..
 وُلَآ تُحَلِّل كُل شَيْء .. وُلَآ تُفَسِّر كُل شَيْء !
فَإِن الَّذِيْن حَلَّلُوْا الْأَلَمــآس وَجَدُوْه فَحْمَا .!

***********************************

الكلمات السابقة قريتها بالصدفة !!

إعتبرتها مثل المسكن المؤقت لطعون السكاكين

التي جرحت فيها اليوم

والحمد لله على كل حال

ونعم ليوم جديد

والله يحفظ الجميع من الحزن والكدر

***********************


فاكهة مثل الكنز .!

عرفتوها ؟

هي

ثمرة الكيوي



ثمرة تحتوي على نسبة من فيتامين سي أكثر من البرتقال !

تحتوي على أملاح الفوسفوروالبوتاسيوم والحديد !

تحتوي على نسبة عالية من الألياف !

تساعد على مقاومة التهابات الأنسجة
والتخلص من حالات الرشح!

تساعد على الهضم وملينة للأمعاء!





من تجارب البنات الحلوين !

أعرف جم وحدة جربت تاكل 2 كيوي على الريوق أو العشا

النتيجة !

سبحانك يا رب

لا اله الا الله

نضارة بالبشرة بشكل موطبيعي

+

يقل تساقط الشعر ( مايحت شعرها) لانه زادت نسبة الحديد

7
7
7
7
7
7
7

(((((علشان جذي كلوا كيوي))))))


أنا ما احب الفواكهة خير شر *_*


بس راح أحاول ادخلها بالدايت مالي


انتوا بعد جربوا علشان تنعموا بحياة أكثر صحة



وبس




الأحد، 4 سبتمبر، 2011

Dr.Oz show @_@




صباحكم / مساكم خيـــر

شخباركم ؟!

بقول بصوت عالي

لا يطوفكم

لا يطوفكم

لا يطوفكم


برنامج دكتور أوز

 DR.OZ show




واللي مايعرفون منو الدكتور اوز مستعدة اعطيهم فكرة عنه :

تميز دكتور اوز تركي الجنسية  بظهوره المبهر
 على برنامج المذيعة الاسطورة اوبرا وينفري
سنة 2004
ومن ذاك الوقت بدت أوبرا تستضيفه بشكل مكرر في برنامجها








،
،
،


طبعا دكتور فلتة مثل هذا
يعتبر  فرصة ذهبية للانتاج لابد ان تستثمر ؟!

علشان جذي صار للدكتور أوز
برنامج خاص
يتكلم عن القضايا والمشاكل الطبية والصحية بشكل عام
اسم البرنامج : DR. OZ show


ولإنه قناة MBC4 المذهلة
 عودتنا على البرامج المميزة
بدت تعرض البرنامج حصريا 
الساعة 5.30 
من السبت الى الاربعاء

( حسافة التوقيت مو ذاك الزود )






شفت أول حلقة وحبيت البرنامج حييييييل 
(^_^)





رايي بالبرنامج :

كلنا نعرف انه المواضيع الطبية معقدة وصعبة الشرح والفهم
خاصة بعض المصطلحات تكون علمية بحتة

لكن ، طريقة شرح الدكتور أوز مبسطة جدا
والسبب استخدامه أفلام وأدوات تسهل على المشاهد عملية الفهم والاستيعاب ويعطيج المختصر المفيد

اللي عجبني وجود  فقرة  في البرنامج
مخصصة لأسئلة واستفسارات الجمهور
وعرض فقرة في نهاية البرنامج تعتبر ملخص
لاهم النصائح والحقائق العلمية التي تم ذكرها في الحلقة


طبعا هذا هو الرابط الرسمي لبرنامج دكتور أوز :






دكتور أوز برنامجك 

يشجعنا نعيش حياة أكثر صحة وجمالا

>> تسجيل متابعة




السبت، 3 سبتمبر، 2011

منتجات المراعي ..!!



قوة :)

شخباركم ؟!

إذا قررنا نسوي ريجيم

لازم نحط في اعتبارنا انه الريجيم محتاج الى ماجلة خاصة

وايد منتجات خالية وقليلة الدسم جربتها
في محاولات ريجيمة سابقة

تبون الصراحة ماكو على المراعي

أحلى وألذ وأطيب منتجات قليلة او خالية الدسم

تذوقتها






أشارككم بتجربتي :




جبنة البيضاء قليلة الكوليسترول :

لذيذة ، أنا اسميها الجبنة الصفرا
واحط عليها زيت زيتون أو مع الزعتر 

  






جبن قلاصات كوليسترول أقل :

طعمه نايس واااي مثل القشطة
أحطها على التوست المحمص
وقرررررقش








 شرائح الجبنة قليلة الدسم :

واااااايد خفيفة وحلوة حق الريوق
واذا ماعندي وقت بسرررعة
خذتلي شريحة جبن وساندويش عالسريع






لبن فيتال :

قليل الدسم ويساعد على الهضم راح تحسون بفرق وبخفة
 اذا شربتوا هاللبن بعد وجبة دسمة
مثال عليها ( الغدا)






****************************************


عصاير المراعي اللذيذة جدا
تنبيه :  مالها علاقة بالريجيم بتاتا
هههههههه ^_^

عصاير أعتبرها عذاب و ( واااااااااو)
ما اقدر أعبر أكثر من جذي





انتهى

اذا جربتوا اي من منتجات الدايت  السابقة
او منتجات دايت أخرى من المراعي او أخرى

حياكم الله في التعليق

وشاركوا بتجربتكم

:)





الجمعة، 2 سبتمبر، 2011

مثل السيدة العجوز !

صباحـكمــ / مسـاكمــ خير

شخباركم ؟!

اليوم راح أتكلم عن اضرار السمنة مو بالتفصيل الممل بشكل مجزء وبسيط ، لأنه لله الحمد إحنا مجتمع مثقف وواعي - وأي أحد تسأله عن أضرار السمنة اكيد راح يتكلم ويجاوب -

طبعا من أضرارها :

آلام العظام خاصة في منطقة الظهر والركبتين والأقدام

وهذا نتيجة لثقل الوزن اللي تحمله العظام





أنا اعاني من هالشي

مثلا/

 لو تمشيت بالسوق

ما أتحمل امشي لمدة طويلة !

على عكس البنات اللي بعمري

أحس بعوار مو طبيعي من راسي لرجولي

على طول أحوس وأدور على كرسي بالمحل أو كافيه علشان ارتاح فيه

مثل العيوز !!


طبعا ماكو غير حـل واحد هو :

إنقاص الوزن



حاولت أدور عن حلول مؤقتة
علشان اقدر أمارس حياتي بشكل طبيعي

هاذي مو حالة !!!

كل ما أمشي خطوتين أحس بعوار يذبح

*******

فكرت ألبس ( جواتي طبية)


الجواتي الطبية أحسن بوايد من الجواتي العادية

 فيها تقنية تريح وتخفف الالام الناتجة من الظهر والركب والأقدام



جربت أكثر من محل بالكويت
وطبعا الأسعار تترواح مابين ( 40 الى 60 دينار)
نصيحة اذا بغيتوا جوتي طبي ، اشتروا بموسم التنزيلات بسرعة
لانه المقاسات السنعة تخلص



من خلال تجربتي :


إيكو : محل دنماركي
معروف عند الرياييل حيل

بس ، اذا رحت ادور على جوتي حقي دايمن أتوهق
لانه المجموعة النسائية شوية

شريت  كعب شكله ولونه حلو وايد
لكن مع الوقت ، قصته ما ناسبت ريولي
وقامت تعورني حيل وأصابعي تورم
صرت ما ألبس هالكعب الا في المناسبات والزوارات
بس اطلع فيه السوق
no way

أروح المحل من فترة الى فترة واتطمش
وقايست أكثر من جوتي
لكن مع الأسف
ما احس براحة نهائيا ..!!




كلاركس : محل بريطاني

الاحذية النسائية أكثر تنوع وعدد من ايكو
حتى الألوان تشوق

أذكر شريت منهم جوتي ( فلات)
روعة وحلو
لكن بعد جم مرة من الاستخدام
حسيت بعوار
يمكن الفلات ما ينفع معاي@_@







جيوكس : محل إيطالي

ألوان الجواتي عجيبة عجيبة


أذكر قست عندهم جوتي ،حسيت براااااااحة على الآخر
لكن ، على اخر لحظة ترددت وماشريته
شكل الجوتي ماعجبني ، صاير جنه رجالي
حسافة كان لونه روعة

يتروالي هالمحل تشترون منه للسفر لانه مريح حــيل :)

اذا شريت منه جوتي وجربته راح ابلغكم عنه





المحل اللي عجبني حيل ومرتاحة معاه


مفيستو: محل فرنسي 

الألوان والقصات وشكل الجواتي النسائية واااااااو
 الجوتي بمجرد ماتقيسونه  تحسون براحة موطبيعية

شريت من عندهم وجربت أكثر من جوتي
ومع فترة من الاستخدام ارتحت معاهم
هالمحل الوحيد اللي اذا دخلته ادري راح اشتري جوتي سنع من غير تردد وحسافة


نزلوا خط جديد من الأحذية تعتمد على تقنية هوائية جديدة

هذا هو الرابط علشان تعرفون عن التقنية أكثر :



وهذا فيديو توضيحي :






بالاخير : الجواتي الطبية مو حل نهائي لآلام العظام لكنها أفضل بكثير من الجواتي العادية من حيث الجودة والصناعة وتساعد على المشي الصحيح والتخفيف من الآلام في حالة وجودها





حبيت أشارككم بتجربتي مع الجواتي الطبية

اذا تعرفون محل للجواتي الطبية شاركونا بتجربتكم



:)