الخميس، 1 سبتمبر، 2011

1/9/2011 lets go @_@

السلامـ عليكمـ ورحمة الله وبركاته



اليــوم الوعــــد

1/9/2011

راح تكون الخطة كالتالي مقسمة الى ثلاث مراحل :

المرحلة الأولى

المرحلة الثانية

المرحلة الثالثة



راح أتكلم عن المرحلة الأولى والبوستات القادمة
راح أعلن موعد المراحل الأخرى



المرحلة الأولى عبارة عن تحديد واتباع والتقيد بالتالي :

1- الريجيم

2- النشاط الحركي

3- موعد ثابت للوزن






انزين أتكلم عن عن رقم (1) - الريجيم المتبع :




ليما الحين ماقررت شنو الريجيم اللي راح أتبعه

يعني هل أخذه من النت ولا من الربع ولا عيادة تغذية أراجعها ؟

بمجرد ما اعرف راح أبلغكم أول بأول









بالنسبة للرقم (2) - النشاط الحركي :




لانه ريجيم من غير رياضة  ما منه فايدة ..

من خلال خبرتي!

الحركة والرياضة مطلوبة بأي ريجيم  اذا تبون صج نتايج مرضية

بالنسبة لي  ماقررت بالنسبة للنشاط الحركي

وإذا توصلت لقرار راح أتكلم عنه بالتفصيل في البوستات القادمة










بالنسبة للرقم (3) - موعد ثابت للوزن :




قست وزني اليوم وماشية على الطرق السليمة لقياس الوزن

اللي ذكرتها في البوست السابق ،،



إحم إحم


الوزن  الحالي : 107.3 كجم

الطول : 158

الهدف : 100 كجم

** يعني ودي أخسر 7 كيلو علشان أطلع من فئة الثلاث أرقام

ودي :/

وقررت تحديد موعد الوزن الياي بإذن الله تعالى راح يكون

2011/10/1

وراح أكتبه في البلوق أكيد

واذا ماضعفت زفوني زف واذا حققت نتيجة شجعوني











( بمجرد ما أتوصل الى  قرار بخصوص الريجيم والرياضة 
أكيد في البوستات القادمة راح أتكلم عن رقم (1) و(2)
باذن الله تعالى)


يعطيكم ألف عافية
محتاجة الى دعمكم وتشجعيكم
يلا انطلقنا
 





هناك 13 تعليقًا:

Katkoota xD يقول...

حاولي تخففين من كل شي تاكلينه لي حجم قبضة اليد مثل ما يقولون
ما ان اشوف ان اخصائية التغذية بتفيد اكثر لانها راح تعرف شاللي تحتاجينه اكثر

و بالنسبة للرياضة دوري عن المفيد لان في بعض الناس بعد ما يتركون الرياضة يردون الوزن اللي يخسرونه باضعاف بس المشي زين مبدئياً لو نص ساعة كل يوم

اهم شي خلي ارادتج قوية

موفقة ان شاء الله

رورو الشخبوطه يقول...

سوي تحليل عقب رجيم مع دكتورة تغذيه احسن واضمن ..

وبالنسبه لي افضل رياضة الرقص او السباحة..

وموفقه يارب..

غير معرف يقول...

روحي حق الاخصائي عيسى دشتي ممتاز
انا ضعغف عليه 13 كيلو بـ 4 اشهر

Now or Never يقول...

كتكوتة : مشكورة ياقلبي :)

نصايحج ثمينة .. حاليا شغالة على التخفيف بالأكل حتى ما استقر على قرار

وبالنسبة للرياضة احاول اتحرك قدر الامكان ..

وماقصرتي علا الدعاء


رورو : نصيحتج ثمينة .. لازم تحليل وراح احرص على هالشي

السباحة حلوة - ماعرف اسبح :/

غير معرف : شكرا جزيلا على زيارتج للمدونة ، سمعت انه هالدكتور يمشي على النظام الكيميائي هالكلام صحيح ؟

AM.SA.CHANNEL يقول...

أول شي إن شاء الله بوستاتي تساعدج و تجاوب على أسألتج، لأنه كل خطوة ذكرتيها تحتاج تفصيل و أنا بحاول أختصر ..

يوم قريت الوزن ذكرتيني بنفسي كنت بوزنج لكن انا أطول عنج بوايد زرافة عدالج ههههههه
و الحمد الله أنا وزني الحين 78

--------

أنا يمكن بتكون نظرتيه مختلفة عن الكل، عشان جي أنصحج تقرين مذكرات سمين سابقا ..

أنا عندي النظام الغذائي يعتمد على تثقيف نفسج، و أحب أخصائي التغذية اللي يقولوولج كلي و لا تحرمين نفسج لكن حاسبي ..

و لازم تكون غندج في اليوم 6 وجبات عشان ما تحسين باليوع

و بالذات إذا كنت تسوين رياضة تحتاجين تاكلين عشان ما يضيع تعبج و تحركين العضلة بدل الدهون ..

و إذا كنت تبغين مفعول سريع في الرياضة حطي مدربة خاصة بتضعفج و إنشاء الله في شهرين إنتي في التسعينات ..

و نصيحة يوم بتحطين مدربة قووليلها لا تركز على الحرق و إنها تضعفج بس قوليلها في نفس الوقت تبين شد ..
و حطي مدربة في النادي مب في البيت تيج .. على الأقل لو خلصت وياج بتسوييين على الأجهزة أو بتدخلين كلاسات ..

و دخلي كلاسات إتضعف و ماتحسين بالملل مثل زومبا في الكويت موجودة و شي بعد شبام بس ما أعرف إذا في الكويت أو لا ..

و صدقيني يوم بتتعودين على الرياضة بتحبينها حب و بتحسين إنها أوكسجين الحياة

و حاولي تدخلين اليوجا ترا واااايد زين للجسم و للنفس ..

أحس وايد أبا أرمس بس أنا في الدوام إن شاء الله من أرد البيت بكمل ههههه بحشرج خخخخخ

Now or Never يقول...

شانيل : ما ادري شقولج ؟!

اشكررررررررج حيل لاهتمامج با قلبي

ردج يثلج الصدر وان دل على ئيء انما يدل على طيبة قلبج وحبج لنقل تجربتج للغير :)

استفدت حيل من كلامج وحطيت نصايحج كلها في بالي

غير معرف يقول...

حبيت كتابتج و ان شاءالله تضعفين بصحة و عافية ، انا برائي تقررين بسرعة اي نادي تدخلين و انا افضل ان يكون قريب من بيتكم عشان ما تملين، و الرياضة جدا ممتعة و تغير النفسية تحسين بنشاط بس التزمي فيه كل يوم مع نظام غذائي من دكتور اول شي لا تركزين حيل على الكيلوات اللي تنزلينها ركزي اكثر ان تغيرين نظامج ، و احنا معاج انساندج

asom يقول...

صباح الخير

حبيبتي انا وزني تقريبا زيك وطولي 155

وناوية ابدا هذي الايام واغير حياتي

من اكل ورياضة وش رايك نكون فريق واحد
انا وانتي

Now or never يقول...

غير معرف : اشكرج يا قلبي علا نصايحج كلامج ياكد اللي ذكرته بالبوست الرياضة مهمة وشي اساسي للدايت وفعلا لازم الدايت يكون مناسب للرياضة

 اسومة : صباح النور يا قلبي اهم شي تتخذين قرار جدي

واعتبريني من هاللحظة في فريقج

يارب تنزلين بصحة وعافية 

asom يقول...

أكيد القرار جدي وتحمست يوم دخلت مدونتك وشفت كلامك والي حمسني اننا متشابهين في الوزن والطول تقريبا.

بس كيف نظامك مو واضح ايش النظام باضبط.

بالنسبة لي نظامي احاول اقلب كل اكلي اكل صحي مثلا الرز بدل العادي استبدلة باأرز بني وأقلل الكميات طبعا.

لأني تعبت من الرجيمات الي تعطي نتيجة وقتية.

والرياضة حملت رياضة تبع كيم كرديشان

وبابدأ فيها بأذن الله.

يارب نوصل للاوزان المثالية من غير شر

Now or Never يقول...

أسوم :أي والله

يا رب نوصل للةون المثالي

بالنسبة للنظامي ماعندي ظام معين امشي عليه ماقررت شنو اللي يناسبني

قاعدة اسوي تخفيف مثلا :

خبز اسمر واشياء مشوية وعصاير طبيعية

أحاول ابتعد عن المنبهات والدليل قاعدة اشرب شاي وانا اكتب الرد هههههههه


الله يوفقج ياقلبي

وخلج دايمن على توصل راح اكتب كل شي اول بأول


وبمجرد ماقرر بخصوص الريجيم راح اكتب كل شي بالمدونة اول بأول

manal يقول...

ان شاء الله يا رب تضعفين وانتي بصحه وعافيه واهم شي الاراده وصدقيني احسن رياضه المشي والحين الجو تعدل بالليل وترى بنتابعج وبنشوف بالتوفيق يارب

Now or Never يقول...

منال : يا هلاااااا وغلا فيج

نورت المدونة

تصدقين عاد الجو وااايد تعدل عن قبل ورياضة المشي احاو بقدر الامكان احرص عليها:)