الأحد، 21 أغسطس 2011

معظم حياتي .. بطة !

لو اسوي مسابقة رمضانية سريعة بدون اعلانات تجارية مكررة وبدون ارسال مسج بكلمة او حرف على الارقام التالية ...فكروا بالمسابقة ... والوعد بالجائزة القيمة جدا  


شنو هالمسابقة ؟ وجم سؤال ؟ وفي اختيارات ؟


المسابقة عبارة عن سؤال واحد ويتيم !


لا اختيارات ولا شي ..


السؤال كالتالي : ماهي المراحل العمرية في حياة الانسان ؟




 

انا ادري محد فيكم يا قرائي الاعزاء راح ياخذ وقت في التفكير !!


الاجابة سهلة ومايبيلها اي Hint او حتى تمليح




 
المراحل العمرية هي :


أولا : الطفولة

ثانيا : المراهقة

ثالثا: الشباب

رابعا : الشيخوخة


وانتهى ..



والجائزة القيمة لكم ... طبعا موحقي !!

ليش ؟

لاني ما استاهلها ..


هم ليش ؟


لإني قضيت معظم مراحل حياتي .. بطـــة !!


على اواخر مرحلة الطفولة بدت معاي المشكلة 
بزيادة طفيفة على الوزن
السبب هو نمط حياتي الغلط
كنت أحب السهر  ليلي هونهاري ونهاري هو ليلي .. وطبعا بالسهر يحلى الأكل والبلع ..


وفي المراهقة تفاقمت المشكلة واصبحت تكبر وتكبر تكبر... والسبب : موضة الوجبات السريعة ماقصرت  ...
آآآآآه يا ايام ..الارنب الجائع تذكرونه ؟


وفي الشباب ايام الجامعة .. والروتين القاتل ..
الريوق صمون او صاج والدهن لازم معاه مشروب غازي علشان تكمل ! والغدا يكون في الكفتيريا ..
ماكو على الماكدونالدز او البرجر كنج واحيانا العيوش !


وبعد الوظيفة ضغط نفسي مو طبيعي ...
 محد ما يعلق علي.. ماكو احد مايفتي في مشكلتي..
زاد الضغط النفسي وقمت اقول اهي خاربة خاربة !!
ماقمت اطلب من المطاعم 
الحالة تطورت :
قمت اروح للمطاعم برجولي واجرب الجديد منها 




ووووو بعد جم سنة ..!!

بدون ما احس حسيت أني قاعدة اغرق ... اغرق ... اغرق

موقادرة اوصل لسطح الماي

النفس راح يقطع مني .. قلبي يخفق بسرعة

أحس بموت .. قاعدددة اختنق


ابي منو ينتشلني ؟

ابي منو يساعدني ؟

ابي منو يشدني من القاع يرفعني فوووووق؟



ابي انقذ نفسي :/


.
.
.


يا بنت الحلال !!

وين الجائزة القيمة ..؟

وين الوعد ؟

قصيتي علينا ؟


السمنة المفرطة من مسبباتها (عادات غذائية سيئة )

موشرط سبب جيني او وراثي أو خلل في الهرومونات ....الخ



شاركت ببعض العادات الغذائية السيئة اللي كنت مدمنة عليها
ارجوكم ابتعدوا عنها او تحكموا فيها


لا تغلطون نفسي

لا تقضون عمركم بالمتن والمرض والتعب


لا تتحسفون نفسي على احلى سنين العمر اللي راحت مني وانا الحين قاعدة احاول اعوض علشان مااقضي اخر عمري بالمتن !!



>> هذه هي الجائزة القيمة <<

التغذية السليمة هو الحل الوقائي من السمنة - الرجاء عدم الاستهانة بتلك الجائزة فقد دفعت ثمنها بسعر غالي

الثمن : أحلى سنين العمر التي لا تعوض



هناك 3 تعليقات:

Unknown يقول...

مو بس العادات الغذائية السيئة
اسباب نفسية ورا زيادة الوزن،،
شوفي شنو مضايقج و عالجيه

aL-NooR . يقول...

الله يكون بالعون
:)
لا لليأس
شدي حيلج
و النتايج بتكون
مفرحة باذن واحد احد

Now or Never يقول...

سرداب : كلامج صحيح أحيانا الضغوطات بالحياة اليومية كانت تشجعني على التخربط والأكل .. كنت ادور على الكاكاو واحووووس باعتقادي انه راح يونسني

النور :شكراااا جزيلااااا

على كلامج الحلووووو